Ordlister og ordbøker til skulebruk

Språkrådet godkjenner ordlister til skulebruk med heimel i opplæringslova § 15-4.

Godkjenning av ordlister og ordbøker til skulebruk – retningslinjer

1. Norskspråklege ordlister og ordbøker til bruk i skulen skal godkjennast av Språkrådet i samsvar med opplæringslova § 15-4.
2. Godkjenningsordninga for skuleordlister og -ordbøker omfattar både digitale og trykte utgåver.
3. Utgjevaren skal kontrollere manus mot Norsk ordbank, bokmål eller nynorsk, før innsending, og manuset skal elles leverast i eit format som er avtala mellom Språkrådet og utgjevaren.
4. Ordlister og ordbøker til skulebruk skal gje fullstendig og nøytral informasjon om valfrie former i rettskrivinga.
5. Behandlingstid for godkjenning blir avtala mellom Språkrådet og utgjevaren når det blir søkt om godkjenning.
6. Større revisjon av ei digital eller trykt utgjeving skal sendast til Språkrådet for ny godkjenning.
7. Fortløpande oppdatering av digitale utgjevingar, etter opphavleg godkjenning, kan skje utan Språkrådets medverknad så lenge godkjende redigeringsprinsipp blir følgde. Digitale utgjevingar skal vere tilgjengelege for Språkrådet for kvalitetskontroll.
8. Oppdateringar som inneber ei tolking av normeringa av vedkommande målform, skal drøftast med Språkrådet. I slike tilfelle skal Språkrådet ha digital tilgang til oppdatert utgjeving for kontroll.
9. Dersom det ikkje blir gjort endringar i den godkjende utgjevinga, gjeld godkjenninga til neste (større) rettskrivingsendring.
10. Utgjevaren må opplyse på lett tilgjengeleg måte om ei ordliste eller ordbok er godkjend av Språkrådet.
11. Språkrådet og andre sektorar som har ansvar for å informere om godkjende hjelpemiddel til eksamen og heildagsprøver, skal opplyse om godkjende ordbøker og ordlister på nettsidene sine.

Vedteke 16. april 2020