S-genitiv har alltid vore i bruk i nynorsk, men i mindre omfang enn i bokmål.
Når kan ein bruka s-genitiv?
Ved særnamn er han svært vanleg: Noregs Bank, Vinjes skrifter, Volvos modellutval.
Ved samnamn i ubunden form eintal er det òg vanleg å nytta s-genitiv: Lang dags ferd mot natt, ei mils veg, i manns minne, mann er manns gaman. Dette er heilt traust og tradisjonell nynorsk. Heller ikkje i fleirtal er han avstikkande: på kvinners vis, alle tings signatur.
Det er ved samnamn i bunden (bestemt) form eintal og fleirtal («byens», «gatas», «landets», «gutanes», «kvinnenes», «åras») at skilnadene i genitivsbruk mellom bokmål og nynorsk viser seg. Her har det tradisjonelt vore lite vanleg å nytta s-genitiv på nynorsk.
Merknad
I namn på offentlege (statlege) institusjonar er s-genitiven komen i bruk ved hankjønns- og inkjekjønnsord i bunden form eintal: Statens forureiningstilsyn, Statsministerens kontor, Forsvarets overkommando, Stortingets ombodsmann for forvaltninga o.a.
Omskriving
Der ein ikkje vil nytta s-genitiv, kan ein skriva om med
- preposisjonar
- samansette ord
- sin, si, sitt, sine
- leddsetningar
a) Omskriving med preposisjonar
bygdens folk > folket i bygda
rådmannens innstilling > innstillinga frå rådmannen (betre enn innstillinga til rådmannen, som kan mistydast)
administrasjonsutvalgets vedtak > vedtaket i/til administrasjonsutvalet
utvalgets oppgave består i å > oppgåva til utvalet er å
barnehagens størrelse > storleiken på/til barnehagen
barnas alder > alderen på borna
b) Omskriving med samansette ord
bygdens folk > bygdefolket
Stortingets vedtak > stortingsvedtaket
FNs erklæring om menneskerettighetene > FN-fråsegna om menneskerettane
c) Omskriving med sin, si, sitt og sine
Der det er tale om eigedomstilhøve, kan ein gjerne bruka omskriving med sin, si, sitt og sine:
bondens traktor > bonden sin traktor (bonden eig traktoren)
Andre døme:
grannen si hytte, Eli sitt hus, kommunen sine pengar
I samanhengar der eigedomstilhøvet ikkje er like tydeleg, bør ein vurdera andre løysingar; døme:
foreningens leder > leiaren for/i foreininga
bygningenes vaskeareal > vaskearealet i bygningane
d) Omskriving med leddsetning
Utvalgets oppgave består i å > Oppgåva (som) utvalet har fått, går ut på å / Utvalet har fått i oppgåve å
De diskuterte beløpets størrelse > Dei diskuterte kor stort beløpet var / skulle vera osv.
med forbehold om kommunestyrets godkjenning av oppprettelse av nye stillinger > med atterhald om at kommunestyret godkjenner (at det blir skipa) nye stillingar.
barnehagens størrelse > kor stor barnehagen er / var / skal vera osv.
en skisse som viser etatens oppbygning > ei skisse som viser korleis etaten er oppbygd.
Det er gitt ulike signaler om kontorets framtidige plassering > Det er gjeve ulike signal om kvar kontoret skal plasserast/vera/liggja.
[Til toppen]