Vi feirar framifrå bruk av norsk i sakprosa

Arrangementet startar kl. 18, er gratis og ope for alle. Velkomen til ein interessant og hyggeleg kveld!

Dei nominerte er (med utdrag frå juryens grunngjeving):

	Åsa Elstad auser fram kunnskap og vurderingar rundt ein sjeldan brei tematikk som dreier seg om fiskeri, demografi, etnografi, landbruk, handel, religion, samferdsle, politikk – men mest av alt om kystkultur, kysthushald og kystkvinner i liv og arbeid. At Elstad har solid kjennskap til dei temaa ho skriv om, skin tydeleg gjennom i vurderingane hennar av ulike sider ved kystens materielle og mentalitetshistoriske kulturar.
	Alfred Fidjestøl er ein djuptloddande formidlar. Han fer friskt fram i eit hav av kjelder og målar fram detaljrike biletflater. Kulturinstitusjonar, kulturpersonar og kulturikonar – inkludert ein mjuk sjimpanse – blir levandegjort gjennom klår prosa og engasjement. Bøkene hans er tidvis tunge kolossar som skaper salrygga bokhyller, men innhaldet er sjeldan tyngande, verken for lek eller lærd.
	Jon Hustad er journalist og kommentator, spesielt i vekeavisa Dag og Tid. Der har Hustad gjennom mange år utvikla ein eigen stil og posisjon, med mange faste lesarar. Hustads kommentarjournalistikk rundt økonomi, infrastruktur og dei lange linjene i norsk samfunnsutvikling er som regel full av skarpe og klare poeng. Hustad skriv om «kjedelege» tema på ein underhaldande, frekk, humoristisk – og grundig dokumentert – måte.
	Erna Osland har ei eiga evne til å møte barnelesaren i augehøgd, både gjennom eit enkelt, biletskapande språk og fine formmessige grep, og gjennom originale val av tema som pedagogen Osland veit at barn er opptekne av og nyfikne på. Som kva slags spennande småkryp som skjuler seg under ein stein, eller korleis vêret blir til, og kor vindane kjem frå. Innanfor sjangeren sakprosa for barn har Erna Osland lenge stått i ei særstilling, som ho slett ikkje har mista med dei siste åras bokutgjevingar.
	Morten Søberg skriv i kreativ, Vinje-inspirert språkføring skarpt og tidvis humørfylt om statsforvaltning, norsk og utanlandsk embetsverk, statsfinansar, Grunnlova og handlingsregelen for Oljefondet. Essaya hans er breiddfulle av reflektert kunnskap om innfløkte emne, ofte krydra med underfundige og høgst relevante kommentarar. Søbergs ferdaminne finn stad så vel i Longyearbyen, London og på ei karibisk øy som i Finansdepartementets verdslege katedral.

• Les heile grunngjevinga her.
• Her kan du lese meir om språkprisen.

På programmet står også ein panelsamtale om den gode sakprosaen, leia av Cathrine Sandnes. I panelet sit:

Jan Inge Sørbø professor ved Høgskulen i Volda	Kristin Fridtun språkvitar og forfattar	Astrid Sverresdotter Dypvik historikar og journalist	Sverre Tusvik pensjonert sjefredaktør og leiar av språkprisjuryen