Søk om å bli «Årets nynorskkommune 2016»
(31.3.16) Kulturdepartementet skal kåre årets nynorskkommune i 2016. Kommunar og fylkeskommunar med nynorsk som målform blir oppmoda om å søkje. Prisen går til ein kommune eller fylkeskommune som har nynorsk som målform.
Utdeling av prisen Årets nynorskkommune 2016 blir i månadsskiftet november/desember, og vinnaren får 100 000 kroner. Føremålet med prisen er å stimulere til god nynorskbruk i kommunane.
Kven kan søkje om prisen?
Kommunar og fylkeskommunar som har gjort ein innsats på eitt eller fleire av områda som er nemnde nedanfor, kan søkje:
- aktiv bruk og synleggjering av nynorsk i kommunale planar
- aktiv bruk av nynorsk i kommunikasjonsarbeid. Dette kan til dømes vere på heimesider, i digitale tenester, i skriftleg informasjon til innbyggjarane og i marknadsføring av kommunen
- eigne retningslinjer for nynorskbruk i kommunen
- tiltak som fremjar bruk av nynorsk i kommunale og interkommunale føretak
- opplæring i god målbruk for tilsette i kommunen
- opplæringstilbod på nynorsk for innvandrarar og flyktningar
- marknadsføring av nynorsk i kulturarbeid og kulturarrangement
- tidleg nynorskinnsats i barnehagar og barneskule
- tiltak som utvidar bruken av nynorsk eller fremjar bruken av nynorsk på nye område
Søknadsfristen er 1. oktober 2016.
Det er kommunane og fylkeskommunane sjølve som søkjer om å bli med i konkurransen. Kommunar som har søkt tidlegare, er velkomne til å søkje.
Språkrådet leier juryarbeidet på vegner av Kulturdepartementet. I juryen sit også representantar for Nynorsk kultursentrum, Landssamanslutninga av nynorskkommunar, Noregs Mållag og Kommunenes Sentralforbund.
Merk søknaden «Årets nynorskkommune» og send han til post@sprakradet.no eller
Språkrådet
Postboks 8107 Dep
0032 Oslo
Kontaktperson: seksjonssjef Kristin Solbjør, Språkrådet, tlf. 977 69 814