Dag for dag
Vekedagane fortel ei himmelsk språkhistorie.
AV ERLEND LØNNUM
Veka vår er prega av fleire norrøne gudenamn: Krigsgudane Ty og Odin, toreguden Tor og kjærleiksgudinnene Frigg og Frøya har gitt namn til tysdag, onsdag, torsdag og fredag. Laugardagen laurdag skil seg ut med sitt jordiske opphav (norrønt laug ‘vaskevatn’), medan månedagen måndag og soldagen sundag sirklar det heile inn.
På latin er det dei romerske gudane som har gitt namn til vekedagane – og planetane: Krigsguden Mars har gitt tysdag, handelsguden Merkur onsdag, himmelguden Jupiter torsdag, kjærleiksgudinna Venus fredag og jordbruksguden Saturn laurdag (Saturday på engelsk).
MÅNDAG | månedagen | latin dies lunae |
---|---|---|
TYSDAG | Ty-dagen | latin dies Martis, Mars-dagen |
ONSDAG | Odin-dagen | latin dies Mercurii, Merkur-dagen |
TORSDAG | Tor-dagen | latin dies Jovis, Jupiter-dagen |
FREDAG | Frigg-/Frøya-dagen | latin dies Veneris, Venus-dagen |
LAURDAG | laugardagen | latin dies Saturni, Saturn-dagen |
SUNDAG | soldagen | latin dies solis |