SERP I MOLOT, STALJ I PUSJKA
СЕРП И МОЛОТ, СТАЛЬ И ПУШКА
Det russiske ordet serp tyder ’sigd’, og molot tyder ’hammar’. Ein sigd og ein hammar lagde i kross var emblemet til kommunistane og Sovjetunionen.
Molot + suffikset -ov var etternamnet til Vjatsjeslav Molotov, ein framståande kommunistisk leiar i fleire tiår. Også serp er namnet på ein reiskap, og etternamnet Serpov finst.
Stalj tyder ’stål’, og stalj + suffikset -in var det offisielle etternamnet til diktatoren Josef Stalin. Han var georgiar og heitte Dzjugasjvili til etternamn. Nesten alle georgiske etternamn endar på -sjvili eller -dze. Båe orda tyder ’son’.
Både molot og stalj i desse to etternamna skulle nok også symbolisera makta til det sovjetiske kommunistpartiet.
Hokjønnsordet pusjka tyder ’kanon’, og pusjka + -in vart til Pusjkin. Aleksandr Pusjkin var den største russiske diktaren på 1800-talet.
Namna Stalin og Molotov har sett far etter seg i vestlege språk, for både stalinorgel og molotovcocktail er frykta våpen.
-- Av Svein Nestor, cand.philol.
Del denne siden
