Alle nye statsborgarar får statsborgarbrev. Då Stephen, Agnes og Edmund Walton søkte om statsborgarskap på nynorsk, venta dei å få både vedtak og statsborgarbrev på denne målforma, slik dei har rett til etter mållova.
UDI svara at statsborgarbrevet berre var tilgjengeleg på bokmål fordi det ville vere dyrt å produsere dette brevet på begge målformer. Då Språkrådet skreiv til UDI på vegner av Walton-familien, snudde UDI i saka.
– No gler vi oss til å få statsborgarbrev på rett målform, seier Stephen Walton.
I eit brev opplyser UDI at statsborgarbreva frå no av skal finnast både på nynorsk og bokmål.
Stephen Walton, som er forfattar og professor i nynorsk skriftkultur, fekk i november Språkprisen 2009 på konferansen Språkdagen for framifrå bruk av nynorsk i sakprosa. I takketalen tok Walton opp saka om statsborgarbrevet.
Sjå opptak av talen her: http://www.youtube.com/Sprakradet#p/u/1/vF0f-9vghTA
Kontaktperson:
Sigfrid Tvitekkja, fagkoordinator i Språkrådet, tlf. 22 54 19 66